Samkvæmt samningi Seðlabanka Íslands við fyrrverandi framkvæmdastjóra gjaldeyriseftirlit bankans, Ingibjörgu Guðbjartsdóttur, frá árinu 2016, fékk hún rúmar 18 milljónir króna við starfslok sín hjá bankanum. Fréttablaðið greinir frá en Seðlabankinn birtir samninginn einnig á vef sínum.

Ingibjörg fékk alls átta milljónir í námsstyrk og þá fékk hún 60 prósent hlutfall launa sinna í 12 mánuði við starfslokin, en samkvæmt heimildum Fréttablaðsins var hún með 1.4 milljónir í laun á mánuði og fékk hún því alls 18 milljónir króna við starfslokin.  Ekki er gerð krafa í samningnum að Ingibjörg snúi aftur til starfa hjá bankanum:

„Fari svo að Ingibjörg kjósi að starfa á öðrum vettvangi að námi loknum og snúi ekki til starfa hjá bankanum, mun bankinn ekki eiga neina endurkröfu vegna ofangreinds styrks vegna skólagjalda og vegna launa, meðan á námsleyfi stendur,“

segir í samningnum.

Samningurinn er hluti af þeim gögnum sem Ari Brynjólfsson, blaðamaður Fréttablaðsins fór fram á að fá afhent frá bankanum, en þurfti að leita á náðir dómstóla til að fá málið í gegn, sem hafðist fyrir rest í síðustu viku með úrskurði Héraðsdóms Reykjaness, eftir að bankinn neitaði að verða við ósk Úrskurðarnefndar upplýsingamála um að afhenda gögnin.

Seðlabankinn hafði áður neitað DV um þessar upplýsingar um hvort bankinn hefði greitt fyrir nám Ingibjargar og bar við persónuverndarsjónarmiðum.

Sjá einnig: Ingibjörg í ársleyfi frá Seðlabankanum

Sjá einnig: Neita að upplýsa kostnað við Harvard-nám framkvæmdastjóra

Sjá nánar: Yfirmaður hjá Seðlabankanum fékk háan styrk frá bankanum til að stunda nám í Bandaríkjunum

Sjá nánar: Seðlabankinn höfðar mál gegn blaðamanni