Björn Leví Gunnarsson, þingmaður Pírata, kemur flokksfélaga sínum Dóru Björt Guðjónsdóttur til varnar í færslu á Facebook vegna orðaskipta sem hún átti við Eyþór Arnalds, oddvita Sjálfstæðismanna í Reykjavík, í Morgunútvarpi Rásar 2 í morgun, líkt og Eyjan fjallaði um.
Sjá nánar: Dóra Björt sakar Eyþór um blákaldar lygar – „Átt að skammast þín fyrir að koma svona fram“
Dóra Björt sakaði Eyþór um lygar og óheiðarleika varðandi sýndarviðskipti sín við Samherja og Morgunblaðið, sem Stundin hafði áður fjallað um. Eyþór neitaði að eitthvað óeðlilegt væri við viðskipti sín og sagði Dóru Björt að skammast sín fyrir slíka framkomu í sinn garð.
Björn Leví gefur ekki mikið fyrir taktíkina hjá Eyþóri:
„Kannski eru eðlileg svör við þessum spurningum. Eins og er þá er erfitt að sjá að svo sé. Meiri upplýsingar gætu breytt einhverju en „skammastu þín“ eru ekki meiri upplýsingar. Það er klassísk flóttaleið þess sem hefur ekki svör.“
Björn segir það vissulega koma borginni við ef kjörinn fulltrúi sé að stunda sýndarviðskipti og gildi það einu þó þau séu stunduð við hagsmunaaðila eða ekki:
„Fjölmiðlar, fjórða valdið, fer með aðhaldshlutverk í samfélaginu. Fjölmiðlar spyrja óþægilegu spurninganna sem við þurfum að svara. Það er ekki svar að segja að aðrir verða að skammast sín, það er einfaldlega þvermóðskuleg og yfirlætisleg framkoma sem sæmir ekki kjörnum fulltrúum gagnvart því aðhaldi sem valdið þarf að svara gagnvart.“
