Samkvæmt nýrri rannsókn meðal kvenna sem starfa nú, eða hafa nýlega hætt störfum á Alþingi, kemur í ljós að um 80 prósent þeirra hafa orðið fyrir kynbundnu ofbeldi. Alls tóku 33 konur þátt í rannsókninni, karlar voru ekki spurðir og var svarhlutfallið 76 prósent, en rannsóknin kemur út í dag í nýrri bók dr. Hauks Arnþórssonar. Fréttablaðið greinir frá.

Alls 80 prósent sögðust hafa orðið fyrir sálfræðilegu ofbeldi og 28 prósent fyrir kynferðislegu ofbeldi og 24 prósent þingkvennanna höfðu orðið fyrir líkamlegu ofbeldi. Þá sögðust tæp 21 prósent hafa orðið fyrir efnahagslegu ofbeldi, til dæmis þegar þeim var neitað um starfskjör eða aðstöðu sem þær áttu rétt á , eða eigur þeirra voru skemmdar.

Í samanburðarrannsóknum Alþjóða – þingmannasambandsins kemur í ljós að hlutfall kvenna á Alþingi Íslands sem lent hafa í kynbundnu ofbeldi er hærra en á öðrum þjóðþingum Evrópu. Munurinn er mestur á líkamlegu og efnahagslegu ofbeldi, en níu prósent fleiri íslenskar þingkonur hafa orðið fyrir barðinu á líkamlegu ofbeldi en stöllur þeirra í Evrópu, hvar 14.8% sögðust hafa orðið fyrir slíku.

Hvað efnahagslegt ofbeldi varðar, hafa íslenskar þingkonur orðið fyrir því í rúmlega 7 prósentum fleiri tilfella en evrópskar.

Í rannsókninni kemur einnig fram að konur séu styttra á þingi en karlar, og að 63.5 prósent þingmanna séu úr efstu lögum þjóðfélagsins.