Þorsteinn Sæmundsson, þingmaður Miðflokksins, nefndi það í síðasta Silfri að Sjálfstæðisflokkur og Samfylkingin væru svo líkir flokkar að vart væri hægt að greina þá í sundur. Hann uppskar mikil mótmæli frá Páli Magnússyni og Guðmundi Andra Thorssyni – sá síðarnefndi sagði að Samfylkingin og Sjálfstæðisflokkurinn væru höfuðandstæður í íslenskum stjórnmálum.
Geir Ágústsson verkfræðingur vegur í sama knérunn í grein sem birtist í Morgunblaðinu í gær. Hann segir þar að stefnuskrá Samfylkingarinnar sé ríkjandi plagg meðal flestra flokka. Þarna sé ekki við Samfylkinguna að sakast, heldur séu aðrir flokkar á „flótta frá eigin hugsjónum“. Þess verður að geta að Geir er frjálshyggjumaður og finnur það Sjálfstæðisflokknum til foráttu að hann sé „enginn frjálshyggjuflokkur“, heldur er hann, að mati Geirs „Eftirhermu-Samfylking“.
