„Það vakna pólitískar spurningar um hvort þetta geti verið út af ósætti innan ríkisstjórnarinnar eða hvort málin stoppi í þingflokkunum. Eða hvort vinnubrögðin séu einfaldlega svona léleg,“

segir Oddný G. Harðardóttir, þingflokksformaður Samfylkingarinnar við Fréttablaðið í dag, í tilefni þess að í septembermánuði lögðu ríkisstjórnarflokkarnir aðeins fram 11 af 29 málum sínum samkvæmt þingmálaskrá og nú í október hafa aðeins fimm af 49 málum verið lögð fram sem boðuð hafa verið. Þá hafa tvö stjórnarmál verið lögð fram sem ekki voru á þingmálaskrá.

Oddný segir þetta vera áhyggjuefni þegar svo skammt er liðið frá því að þingið hófst og þingmálaskrá var lögð fram:

„Það er talað um bætta áætlanagerð, aukið gagnsæi og meiri skilvirkni þingsins. Það hefst ekki með svona vinnubrögðum.“

Rætist úr þessu

Katrín Jakobsdóttir forsætisráðherra segir engar skýringar hafa á seinaganginum:

„Við erum að fara hægar af stað en ég hefði viljað enda stefna ríkisstjórnarinnar að jafna álagið yfir þingveturinn. Það er þó að rætast úr þessu. Töluvert af málum var afgreitt úr ríkisstjórn á föstudag og von er á fleirum í vikunni.“