Til stendur að opna Marriott hótelið við hlið Hörpu á næsta ári, en það fær nafnið Reykjavík Edition og verður fimm stjörnu hotel, það fyrsta á Íslandi. Upphaflega átti að opna það á þessu ári.

Átti það að kosta um 16 milljarða samkvæmt fyrstu áætlunum, en stefnir nú í að kosta um 20 milljarða.

Richard L. Friedman, forstjóri og aðaleigandi bandaríska fasteignaþróunarfélagsins Carpenter & Company, sem er einn aðalfjárfestirinn í hótelinu, hefur ekki áhyggjur af kostnaði eða seinkun, en hann var í viðtali á RÚV í gær:

„Ég hef haft umsjón með næstum 30 hótelum og ekkert þeirra hefur verið tilbúið á tilsettum tíma. Þetta er mjög algengt í þessum bransa. Sem er dýrt, en þetta er fyrsta fimm stjörnu hótelið á Íslandi. Við reynum ekki að spara neitt. Við viljum byggja upp hótel sem er langtum betra en önnur hótel á Íslandi.“

Hótelið verður 17 þúsund fermetrar og með 253 herbergjum og mun sjá um 400 manns fyrir vinnu, sem Friedman segir vonast til að verði flestir Íslendingar. Friedman hefur þó ekki áhyggjur af fækkun ferðamanna:

„Það veldur okkur engum áhyggjum. Síðasta ferðamannasprengja, ef svo má segja, byggðist lauslega á Airbnb, WOW og öðru slíku. Við reiddum okkur aldrei á það. Hvert sem ég fer í Bandaríkjunum, þar sem ég er að byggja hótel um allt land, finnum við fólk sem segist vilja fara til Íslands en hefur ekki fundið rétta staðinn eða rétta hótelið. Ég held að þetta fari allt vel. Við höfum engar áhyggjur af þessu,“

segir Friedman.