Snæfellsjökull er áttundi hæsti jökull landsins, 1.446 metra hár. Gervitungl bandarísku landfræðistofnunarinnar USGS og geimvísindastofnunarinnar NASA, Landsat-8, tók mynd af jöklinum þann 30. september.
Ingibjörg Jónsdóttir, dósent í landfræði við jarðvísindadeild Háskóla Íslands, hefur teiknað útlínur jökulsins líkt og hann var árið 1910, samkvæmt frumteikningu herforingjaráðskorts og Morgunblaðið greinir frá í dag.
Ingibjörg segir að þó svo kortin séu ekki 100% nákvæm, séu þau hinsvegar afar vönduð og gefi góða hugmynd um þróunina. Þá segir einnig í frétt Morgunblaðsins að ef hlýni um aðrar tvær gráður á þessari öld, muni jökullinn missa stóran hluta af ákomusvæði sínu.
Þeir sem erfa munu landið munu því kannski syngja breyttan texta við lagið Ég er kominn heim, sem Óðinn Valdimarsson gerði vinsælt með KK Sextett, eftir texta Jóns Sigurðssonar, líkt og vísað er til í fyrirsögn.
