Tveir af þremur nefndarmönnum siðanefndar Alþingis, sem taka mun á Klaustursmálinu þegar tveir nýir varaforsetar forsætisnefndar vísa málinu þangað, hafa óskað eftir því að fjalla ekki um Klaustursmálið. Það eru þau Salvör Nordal, umboðsmaður barna og Hafsteinn Þór Hauksson, dósent við lagadeild HÍ. Frá þessu var greint í hádegisfréttum RÚV og staðfesti Steingrímur J. Sigfússon þetta við mbl.is.
Ákvörðun Hafsteins er ekki sögð tengjast Klaustursmálinu og haft er eftir Salvöru að vegna anna í embætti sínu geti hún ekki fjallað um Klaustursmálið.
Ekki er ljóst hver verður varamaður Salvarar, en Margrét Vala Kristjánsdóttir tekur sæti Hafsteins.
Formaður siðanefndar er fyrrverandi forseti Alþingis, Ásta Ragnheiður Jóhannesdóttir.
