Fréttablaðið skýrir frá þessu í dag. Haft er eftir Sigurði Inga að mikilvægt sé að lagafrumvarp um þessi mál verði lagt fram næsta vetur. Fréttablaðið segist hafa heimildir fyrir að allflestir ráðherrar styðji hert lög um eignarhald á jörðum.
„Það var skipaður starfshópur sem hefur að mínu mati ekki unnið nægilega hratt.“
Er haft eftir Sigurði Inga.
Í gær var skýrt frá því að auðmaðurinn Jim Ratcliffe hyggi á stórfellda uppbyggingu á Norðausturlandi til að vernda Atlantshafslaxinn. Ratcliffe hefur keypt tugi jarða á svæðinu á undanförnum misserum, flestar í Vopnafirði. Fréttablaðið hefur eftir Jóni Helga Björnssyni, formanni Landssambands veiðifélaga, að ekki sé ólíklegt að fyrirhugaðar framkvæmdir Ratcliffe geti haft jákvæð áhrif í þeim ám sem framkvæmdirnar beinast að en muni ekki hafa mikil áhrif á aðrar ár eða laxastofninn í heild sinni.