Samkvæmt nýrri skoðanakönnun Zenter rannsókna mælist fylgi Sjálfstæðisflokksins nú 20,5% en var 22,5% í síðasta mánuði. Fylgi Miðflokksins mælist nú 13,4% en var 9,8% í síðasta mánuði. Í könnuninni var fólk einnig spurt hvað það kaus í þingkosningunum 2017. Í ljós kom að 69,5% þeirra sem kusu sjálfstæðisflokkinn þá styðja hann nú en 21,1% þeirra styðja nú Miðflokkinn. Þannig hefur fimmti hver kjósandi Sjálfstæðisflokksins flutt sig yfir til Miðflokksins.

Fréttablaðið skýrir frá þessu í dag en könnuni var gerð af Zenter rannsóknum 24. til 26. júlí síðastliðinn.

Blaðið hefur eftir Bjarna Benediktssyni, ráðherra og formanni Sjálfstæðisflokksins, að hann sé ekki ánægður með að fylgi flokksins mælist undir kjörfylgi en hér sé um dæmigerðar sveiflur á miðju kjörtímabili að ræða. Almennt megi búast við að ríkisstjórnarflokkar gefir eftir á miðju kjörtímabili.

Sigmundur Davíð Gunnlaugsson, formaður Miðflokksins, sagðist telja að orkupakkamálið hafi áhrif á fylgið.

„En kannski ekki bara út af því máli sjálfu heldur meira út af því að við viljum vera prinsippflokkur. Það sem ég vona er að menn séu að meta það við okkur að við séum flokkur sem stendur við sín prinsipp. Það birtist í orkupakkamálinu en mun gera það líka í fleiri málum.“

Sagði Sigmundur.

Fylgi Samfylingarinnar mældist 14,4% en var 14,1% í síðasta mánuði. Píratar mælast með 12,3% en voru með 15,2% í síðasta mánuði. VG mælist með 12,9% en var með 13,1% í síðasta mánuði. Viðreisn mælist með 10,6% en var með 9,9% í síðasta mánuði. Framsókn mælist með 8,2% en var með 7,1% í síðasta mánuði. Flokkur fólksins mælist með 3,2% en var með 4,3% í síðasta mánuði.