Ragnar Önundarson, sem sagði Áslaugu Örnu Sigurbjörnsdóttur, ritara og þingmann Sjálfstæðisflokksins, vera „sætan krakka“ í færslu sinni á Facebook, virðist telja að kjarninn í málflutningi sínum hafi misskilist, en hann ritar nýja stöðufærslu um málið nú síðdegis hvar hann segir að pistill sinn hafi ekki snúist um persónur:
„Nokkrar viðkvæmar sálir hafa hrokkið í varnarstöðu út af þessum status. Hann snýst ekki um persónurnar sem nú gegna æðstu trúnaðarstörfum í flokknum. Hann snýst um það hvernig stjórnmálaflokkur hætti að leggja höfuðáherslu á pólitík og tók í staðinn upp auglýsingamennsku og hégómaskap. Vilji menn hefja flokkinn sinn á ný til vegs og virðingar verða þeir að þora að ræða það hvað fór úrskeiðis og leiddi til þeirrar niðurlægingar sem hann má þola núna. Geri menn það ekki verða mistök endurtekin.“
Ragnar sagði orðrétt:
„Miðaldra, hvítur, kristinn karlmaður, helst reffilegur og peningalegur, er formaður. Glæsilegasta konan er varaformaður og sætasti krakkinn ritari. Þetta er afleiðing af valdatilfærslu prófkjöranna.“
Um er að ræða Bjarna Benediktsson, Þórdísi Kolbrúnu R. Gylfadóttur og Áslaugu Örnu Sigurbjörnsdóttur, en sú síðastnefnda er sú eina sem hefur tjáð sig um ummælin.
Sjá nánar: Áslaug Arna um „óeðlilegan áhuga Ragnars:„Hvað næst? #ekkiveraragnar“
