Uppfært
„Fréttin“ hér að neðan var framlag Eyjunnar til aprílsgabbs gærdagsins og er því uppspuni frá rótum líkt og glöggir lesendur uppgötvuðu samstundis.
Góðar stundir.
Bára Halldórsdóttir, sem tók upp samtal þingmanna á Klaustri bar þann 20. nóvember í fyrra, hefur gengist við ásökunum Miðflokksins um að hlerunin hafi verið skipulögð. Þetta viðurkenndi Bára fyrir ritstjórn DV í dag.
Bára sýndi DV samning sem hún gerði við Framsóknarfélagið Sauðskinnsskó & silkisokka í Guðmundarfirði, en formaður þess er hinn sérlundaði milljarðamæringur, Marteinn. U. Unnsteinsson, sem gegnt hefur trúnaðarstörfum fyrir Kaupfélag Bolvíkinga og var í 4. sæti á framboðslista Framsóknarflokksins á Ísafirði í Alþingiskosningunum 1984.
Marteinn er vel tengdur innan Framsóknarflokksins, en hann er guðfaðir stjúpsonar Sigursteins Breiðfjörð, fyrrum gjaldkera Framsóknarflokksins, en Sigursteinn og Sigurður Ingi Jóhannsson, formaður Framsóknarflokksins, eru fjórmenningar.
Hefur Marteinn fjármagnað ýmsa viðburði á vegum Framsóknarfélagsins í gegnum tíðina, en hann styrkti til dæmis hrútasýningu Búnaðarfélags Vatnsvíkur árið 2003 um 200 þúsund krónur og gaf út fjórblöðunginn Gamansögur af Framsóknarmönnum árið 1979.
Þá á Marteinn ráðandi hlut í sláturfélagi Vatnsvíkur, Síðuspiki, en Marteinn efnaðist gríðarlega á árunum 1980-1983, með sölu á Betamax myndbandstækjum.
Í samningnum kemur fram að Bára taki að sér upplýsingaöflun gegn verktakagreiðslu, að upphæð 300 þúsund krónum. Bára segir við Eyjuna að hún hafi ekki lengur getað haldið þessu leyndu lengur, nú þegar myndbandsupptökur sýndu hið sanna eðli málsins.
Segist Bára vera fórnarlamb aðstæðna og hún hafi lent á milli steins og sleggju í pólitískum átökum Sigmundar Davíðs Gunnlaugssonar og Framsóknarflokksins:
„Þetta er allt rétt hjá Miðflokknum. Þetta er eitt stórt samsæri.“
Sökum lagaflækja má Eyjan/DV ekki birta samninginn í heild sinni á miðlum sínum, en verður hann til sýnis milli klukkan 12-16 í móttöku Frjálsrar fjölmiðlunar á annarri hæð að Suðurlandsbraut 14 í dag.
Hinsvegar má birta eftirfarandi skjáskot af samningnum:
