Ólöf Skaftadóttir, ritstjóri Fréttablaðsins, segir óskiljanlegt að RÚV þurfi á hverju ári að taka upp ávarp forsætisráðherra á Gamlársdag á sama tíma og beðið sé eftir forsætisráðherra í Kryddsíld Stöðvar 2. Kryddsíldin, þar sem allir leiðtogar flokkanna koma saman og gera upp árið, hefst kl. 14 á Gamlársdag en ávarp forsætisráðherra er sýnt á RÚV um kvöldið. Segir Ólöf í leiðara Fréttablaðsins í dag að það sé óskiljanlegt hvers vegna þetta þurfi að skarast. Þess má geta að Heimir Már Pétursson, einn umsjónarmanna Kryddsíldarinnar, sagði minnst tvisvar í útsendingunni að Katrín Jakobsdóttir væri of sein þar sem RÚV þyrfti að taka upp ávarpið á sama tíma.

„Þrátt fyrir ítrekaðar umleitanir af hálfu einkamiðilsins sér Ríkisútvarpið sér ekki fært að taka upp ávarpið, sem ekki er sýnt í beinni útsendingu, á neinum öðrum tíma en þeim tveimur klukkustundum sem Kryddsíldin er í loftinu. Þetta er einungis lítið dæmi um yfirgang Ríkisútvarpsins á fjölmiðlamarkaði, en segir hins vegar heilmikla sögu,“ segir Ólöf og bætir við:

„Kryddsíldin er skrautfjöður Stöðvar 2, einkamiðils sem keppir á ósanngjörnum og rammskökkum fjölmiðlamarkaði, þar sem Ríkisútvarpið er alltumlykjandi. Á meðan einkareknir fjölmiðlar berjast í bökkum, geta stjórnendur í Efstaleiti ekki hugsað sér að láta Stöð 2 eftir eitt dagskrárbil á milli tvö og fjögur, einu sinni á ári.“

Þar sem RÚV sjái sér ekki fært um að færa tímann þá biðlar Ólöf til Katrínar sjálfrar:

„Hér er hins vegar lagt til að forsætisráðherra sýni það í verki að henni sé umhugað um að hér geti þrifist eðlileg flóra fjölmiðla í lýðræðisríki. Hún biðji um að tökum sé einfaldlega flýtt um rúman hálftíma. Klukkan tvö þurfi hún að vera mætt annað.“