Verst geymda leyndamálið í Vestmannaeyjum er óánægja sumra Sjálfstæðismanna með framboðsmál flokksins, sem stafar af því að flokkurinn felldi tillögu um að haldið yrði prófkjör til að ákveða röðun á lista flokksins fyrir komandi sveitastjórnarkosningar. Flokkurinn hefur ekki haldið prófkjör í Vestmannaeyjum í 28 ár, en Elliði Vignisson bæjarstjóri ku ekki vera allra í Eyjum, hans vitjunartími sé kominn eftir 12 ára valdasetu.

Morgunblaðið greinir frá því í dag að óánægðir Sjálfstæðismenn í Eyjum hafi hist í gærkvöldi til skrafs og ráðagerða á lokuðum fundi. Þar mættu þau Íris Róbertsdóttir og Elís Jónsson, sem nefnd hafa verið forystusauðir mögulegs sérframboðs.

„Það var bara verið að ræða breytingar sem fólk myndi vilja sjá í samfélaginu hérna. Hvað sem verður í framtíðinni er svo sem ekki alveg ljóst,“

hefur Morgunblaðið eftir Elís, sem sagði annan fund væntanlegan í framhaldinu. Samkvæmt honum voru fundargestir um fjörutíu, með allskyns bakgrunn og ágætis þverskurður af samfélagi Eyjamanna.

Samkvæmt Eyjafréttum bauðst Írisi Róbertsdóttur að taka 3. sæti á lista Sjálfstæðisflokksins fyrir komandi kosningar, sem hún hafi hafnað eftir sólarhringsumhugsun, en hún vildi ekki tjá sig um málið að svo stöddu, en sagðist ætla að gera það innan tíðar.

Ljóst er samkvæmt þessu að undirbúningur að sérframboði er hafinn, hvað sem síðar verður. Það verður þó við ramman reip að draga, Sjálfstæðisflokkurinn fékk 73,2 prósent atkvæða í síðustu kosningum og hafa setið lengi á valdastóli í Vestmannaeyjum.