Eftir að í ljós kom að Ásmundur Friðriksson, þingmaður Sjálfstæðisflokksins, fengi 4,6 milljónir endurgreiddar vegna aksturskostnaðar á síðasta ári, hefur alnetið logað. Á Pírataspjallinu, hvers meðlimir eru ekki þekktir fyrir að tala undir rós, má greina mikla reiði og tortryggni í garð Ásmundar, sem sjálfur segist aðeins fara eftir reglum Alþingis.

Hingað til hefur engum tekist að hrekja þá staðreynd.

Björn Leví Gunnarsson birtir innlegg sitt á Pírataspjallinu, þar sem hann spyr hvort Ásmundur sé að nýta tíma sinn nægilega vel, þar sem hann er svo mikið undir stýri:

„Að keyra tæpa 48 þús km. tekur um 22 sólarhringa á 90 km hraða. Meðalvinnumánuður er um 22 dagar. Það þýðir að það rekur þrjá mánuði í fullri vinnu. Nú spyr ég, er þingmaður að nýta tímann sinn vel að skutlast svona á fundi út um allt? 25% af vinnutíma ársins í að keyra á milli funda.“

Þá tekur maður að nafni Jack Hrafnkell Danielsson hressilega til orða, jafnvel svo að varði við lög:

„Er ekki komin tími til að ræða þessi mál. Útborgaðar bætur öryrkja eru enn innnan við 200 þúsund á mánuði og Ási ökuóði halar inn 385 þúsund á mánuði að meðaltali, skattfrjálst ofan í sín laun. Það er eins gott að ég er búsettur erlendis því ef ég mundi mæta þessu viðbjóslega eintaki af manneskju, (ef manneskju er hægt að kalla), þá mundi ég sennilega berja hann til óbóta á stundinni.“

Jack Hrafnkell birtir þessa færslu við tilbúna „frétt“ sem er af bloggsíðu hans sjálfs.

Fyrirsögn fréttarinnar er „Gagnslaus blóðsuguþingmaður fær meiri aksturspeninga en öryrki fær í bætur á mánuði. Siðblindan er algjör“

Í „fréttinni“ sjálfri er Jack Hrafnkell afar orðljótur í garð Ásmundar, sem og í garð Katrínar Jakobsdóttur forsætisráðherra.

Ekki verður orðbragðið haft eftir hér, nóg er nú samt.