Pétur G. Markan, sveitastjóri Súðavíkurhrepps og stjórnarformaður Fjórðungssambands Vestfjarða, er hlessa yfir þeirri ákvörðun Sigurðar Guðjónssonar, forstjóra Hafrannsóknarstofnunnar, um að hætta við að flytja starf sviðsstjóra stofnunarinnar til Ísafjarðar, líkt og Gunnar Bragi Sveinsson, þáverandi sjávarútvegsráðherra, mælti fyrir árið 2016.

Samkvæmt Sigurði verður ekkert af flutningi starfsins, en þetta sagði hann við Bæjarins besta á Ísafirði:

„Þetta var yfirlýsing þáverandi ráðherra og hún er sérstök að því leyti að henni fylgdi engir fjármunir og hingað til hafa ráðherrar ekki hlutast til um staðsetningu einstakra starfa. Mest af starfsfólki sviðsins starfar í Reykjavík og í Grindavík.“

Þá benti Sigurður á að stofnunin hefði eflt starfsemina á Ísafirði frá yfirlýsingu Gunnars Braga, úr fimm starfsmönnum í sjö.

Pétur G. Markan gefur lítið fyrir þessi orð Sigurðar:

„Það er fráleitt að embættismenn geti valið að hafna ákvörðunum ráðherra – hreinlega beðið þar til komin er ráðherra sem þeim þóknast.

Þá tilkynna þeir roggnir að ekkert verði af vonum Vestfirðinga. Hafðu skömm á þessari stjórnsýslu Sigurður.

Allt tal um fjármagnsleysi er aumt yfirklór. Ef það er til aur fyrir stöðunni fyrir sunnan – þá kostar hún það sama hér.

Hér er um nýtt starf að ræða og fráleitt að hafa það annars staðar en í kjarna uppbyggingar fiskeldis á Íslandi. Annað er afsláttur á fagmennsku og gæðum í mikilvægri uppbyggingu. Slíkt taka Vestfirðingar ekki í mál. Vestfjarðastofa hefur kallað eftir fundi með ráðherra vegna málsins.“