Á vef Alþingis er Halldóra Mogensen, þingmaður Pírata, sögð formaður Pírata frá 2017. Píratar hafa löngum stært sig af formannsleysi sínu og að hafa ekki fallið í formannsgryfju fjórflokksins og þannig sloppið við hið alkunna foringjaræði.

Þessi flati „strúktúr“ , andstæðan við hinn útbreidda valdapíramída, fékkst í arf frá Borgarahreyfingunni og hefur haldist síðan. Andúð flokksins við vald og valdboð hefur haldið þessu í sessi og er jafnan talað um ígildi formanns, talsmann, eða kaftein í því samhengi, en formaður þingflokksins hefur jafnan borið skyldur eiginlegs formanns á herðum sér. Að vísu kom upp sú umræða innan Pírataflokksins að taka upp formannsembætti fyrir rúmlega ári síðan, en fallið var frá því.

Halldóra segist ekki vera formaður Pírata, nema að nafninu til:

„Við vörpum nú bara hlutkesti í upphafi hvers þings um hver fær þessa nafnbót hverju sinni. Við erum ekki með neitt eiginlegt formannsembætti, ég ber þetta núna að nafninu til, en hef engar skyldur í þeim efnum,“

sagði Halldóra við Eyjuna.

Samkvæmt reglum Alþingis fá formenn stjórnmálaflokka að ráða sér aðstoðarmann, hvers laun Alþingi greiðir. Þá fá formenn stjórnmálaflokka greitt 50% álag ofan á hefðbundið þingfararkaup.

„Ástæðan fyrir því að við höldum í formannsembættið að nafninu til er einmitt sú að þá fáum við aðstoðarmann, sem starfar í raun fyrir þingflokkinn allan, ekki bara fyrir mig. Við þingmenn Pírata sem erum titlaðir formenn hverju sinni, þiggjum hinsvegar ekki þetta 50% álag ofan á launin sem reglur Alþingis kveða á um,“

sagði Halldóra.

Þeir alþingismenn, sem eru formenn stjórnmálaflokka, sem hlotið hafa a.m.k. þrjá þingmenn kjörna, og eru ekki jafnframt ráðherrar, fá greitt 50% álag á þingfararkaup, samkvæmt vef Alþingis.