Björn Leví Gunnarsson, þingmaður Pírata, skrifar um veggjöld í Morgunblaðið í dag. Hann segir stjórnarmeirihlutann hafa ætlað að drífa frumvarp um samgönguáætlun í gegn án þess að gefa almenningi kost á að segja skoðun sína á málinu, sem teljist ansi stórt:
„Aðalatriðið var að þær forsendur sem stjórnarmeirihlutinn var að leggja til voru miklu meiri en einstakar veggjaldaframkvæmdir. Gjaldtaka í kringum allt höfuðborgarsvæðið og í flestum göngum landsins. Meiri háttar breytingar á fjármögnun samgöngukerfisins, án þess að gefa hagsmunaaðilum, borgurum landsins, tækifæri til þess að gera athugasemd við málið. Það tókst hins vegar að fresta afgreiðslu samgönguáætlunar þangað til í lok janúar,“
segir Björn Leví og býður lesendum að segja skoðun sína á málinu með því að senda inn umsögn:
„Það er mjög einfalt að gera. Þú sendir tölvupóst á nefndarsvid@althingi.is með fyrirsögninni: „Umsögn um Samgönguáætlun, mál 172 og 173“, nafninu þínu og athugasemd sem getur þá verið annaðhvort „Ég andmæli áformum um álagningu veggjalda eins og þær koma fram í forsendum meiri hluta umhverfis- og samgöngunefndar“ eða „Ég styð áform um álagningu veggjalda eins og þær koma fram í forsendum meiri hluta umhverfis- og samgöngunefndar“. Einnig getur þú farið á vefsíðuna https://sites.google.com/view/veggjold og smellt á annan hvorn takkann sem þar er að finna til þess að auðvelda þér umsögnina.“
Að lokum segir Björn Leví að aðrar leiðir séu einnig í boði en að rukka almenning um veggjöld, til dæmis að lækka skatta aðeins minna:
„Við skuldum ansi mikið í uppbyggingu samgöngukerfisins eftir hrunið. Vissulega getum við fjármagnað það með veggjöldum en það eru margar aðrar leiðir til þess líka. Sem dæmi þá kosta þær framkvæmdir sem stjórnarmeirihlutinn býst við að fara í um 5 milljarða á ári. Á sama tíma lækkar stjórnin skatta um tæpa 12 milljarða. Það væri auðvelt að lækka skatta aðeins minna og fjármagna samgönguskuldina. Hvað finnst þér?“
