Katrín Jakobsdóttir forsætisráðherra, telur eðlilegt að sexmenningarnir sem viðriðnir eru í Klausturupptökurnar íhugi stöðu sína í kjölfar frétta sem borist hafa af hinu örlagaríka kvöldi. Í samtali við DV vildi hún ekki gerast dómari í málinu, aðspurð hvort hún taldi að einhverjir ættu að segja af sér þingmennsku:
„Mér finnst auðvitað eðlilegt að þeir íhugi sína stöðu. Ég ætla ekki að gerast einhver dómari í því en mér finnst eðlilegt að þeir auðvitað horfi í eigin barm og íhugi sína eigin stöðu. Forsætisnefnd Alþingis ætlar að taka þetta mál til umfjöllunar eftir helgi og við höfum auðvitað það ferli í okkar þingsköpum það er hægt að kalla til siðanefnd Alþings, sem hefur að mínu viti aldrei verið kölluð til, en er skipuð. Það er auðvitað forsætisnefndar að ákveða hvort hún geri það á mánudaginn.“
Hefur Steingrímur J. Sigfússon, forseti þingsins, eitthvað sagt um það hvort það verði gert eða ekki?
„Nei, hann hefur ekki gefið það út, en þetta er auðvitað eitthvað sem hefur verið til umræðu.“
Katrínu finnst ummælin sem viðhöfð voru á upptökunum dapurleg:
„Þau auðvitað afhjúpa bæði fordóma gagnvart ólíkum hópum ekki síst líka sérstök viðhorf í garð kvenna sem við höfum talið að ættu að heyra sögunni til og það er umhugsunarefni ári eftir MeToo byltinguna að þá sé talað með þessum hætti um konur. Það er dapurlegt og auðvitað hefur þetta áhrif, auðvitað hefur þetta áhrif á okkur sem vinnustað. Við erum kjörnir fulltrúar, ölvuð eða óölvuð, á opinberum vettvangi, þegar við erum í almenna rýminu þá hljótum við huga að því hvernig við högum okkar gjörðum.“
Aðspurð um hvort hún telji að skerpa þurfi á siðareglum þingmanna, segir Katrín að hún vilji gefa kerfinu færi á að takast á við málið fyrst.
„Nú auðvitað kemur það bara í ljós hver viðbrögð þingsins verða og hvort fólk telur þau fullnægjandi. Þannig ég held að áður en við förum kannski að tjá okkur um að eigi að skerpa á einhverju þá skulum við gefa þinginu tækifæri til þess að nýta þá ferla sem eru til staðar.“
Engin viðurlög eru við brotum á siðareglum þingmanna. Aðspurð hvort það skjóti ekki skökku við, sagðist Katrín ekki vera þeirrar skoðunar:
„Það er bara almennt ekki þannig. Ég trúi því og er sammála þeim siðfræðingum sem hafa um þessi mál fjallað, að siðareglur eigi einmitt að snúast um það að við eigum að geta bætt okkur og til þess setjum við okkur þær. Siðareglur eru auðvitað ekki lög. Þær eru reglur sem við setum okkur sjálf, en auðvitað kallar þetta á umræður í okkar hópi. Við setjum siðareglur til þess að leiðbeina okkur.“
