Kolbrún Baldursdóttir, borgarfulltrúi Flokks fólksins, er afar slegin yfir fréttum í tengslum við leyniupptöku af drykkjusamsæti nokkurra þingmanna Miðflokksins og Flokks fólksins. Varðandi ummæli þingmanna Flokks fólksins á upptökunum, þeirra Ólafs Ísleifssonar og Karls Gauta Hjaltasonar, þá dregur Kolbrún mjög í efa að einföld afsökunarbeiðni dugi til að bæta fyrir þau brot. Á upptökunni heyrist Karl Gauti Hjaltason segja: „Ólafur er örugglega sammála mér að Inga Sæland getur þetta ekki.“ Ólafur Ísleifsson hreyfir þar engum mótmælum.
Varaformaður og þingmaður Flokks fólksins, Guðmundur Ingi Kristjánsson, segir að allir þingmennirnir sem voru þarna samankomnir eigi að segja af sér. Sjá frétt DV. Aðspurð hvort hún sé sammálu þessu segir Kolbrún:
„Það er stjórnarfundur hjá okkur á eftir og ég vil heyra hvað Inga og aðrir flokksmenn segja áður en ég gef út slíkar yfirlýsingar. Það er formannsins að meta hvernig beri að bregðast við þessu en ef ég á að setja mig í hennar spor þá er alveg ljóst frá mínum sjónarhóli að einföld afsökunarbeiðni dugar engan veginn til. Þetta er mjög alvarlegt trúnaðarbrot gegn formanninum, það sem þarna er sagt og trúnaðarbrot sveiflast ekki yfir í traust með einfaldri afsökunarbeiðni,“ segir Kolrbrún.
Kolbrún segir að ölvun dugi ekki sem afsökun fyrir þessari hegðun: „Er ekki líka sagt að öl sé innri maður? Það sem ég hef heyrt og lesið af þessu finnst mér lýsa mikilli kvenfyrirlitningu og þetta snýst ekki bara um þessar konur sem þarna er rætt um. Ég sem kona upplifi þetta sem árás. Mér finnst þetta lýsa líka svo sorglegum viðhorfum og ég hélt við værum komin lengra en þetta.“
Lömuð yfir Gunnari Braga: „Hvað býr innra með þessum einstaklingi?“
Kolbrún segist vera mjög slegin yfir framferði og ummælum Gunnars Braga, þingmanns Miðflokksins, á upptökunum. Ekki síður var henni þó misboðið er hún hlustaði á viðtal við Gunnar Braga í morgunútvarpinu á Rás 2 í morgun þar sem hann útskýrði hegðun sína:
„Ég var að keyra á meðan ég hlustaði á útvarpi og ég bara missti kjálkana, ég varð gapandi af undrun. Ég var sem lömuð og hugsaði með mér: Hvað býr eiginlega innra með þessum einstaklingi. Hann sló í og úr og það skorti alla einlægni í iðrun hans. Við gerum öll mistök en jesús minn almáttugur, þessi hegðun er svo fyrir neðan allar hellur. Við stjórnmálamenn, sem fólkið í landinu hefur valið til ábyrgðar, við eigum að vera fyrrimyndir. Og þessi maður var utanríkisráðherra!“
Mjög slegin yfir ruddalegu gríni Gunnars Braga um Friðrik Ómar
Einna verst af þessu öllu fellur Kolbrúnu fordómar gegn samkynhneigð sem virðast vera tjáðir á upptökunum. Gunnar Bragi kom þar með sérkennilega líkingu þar sem hann talaði um „smjörið á smokknum hans … þarna … Friðriks Ómars.“
Kolbrúnu finnst þetta vera ákaflega ljótt og þar sem fyrrverandi eiginmaður hennar og mjög góður vinur hennar í dag er samkynhneigður tekur hún þetta til sín.
