„Miðað við núverandi samkeppnislög í landinu er það, held ég, ekki hægt. Það væri um margt áhugavert að minnsta kosti að skoða hvað það þýddi ef þessi tvö félög gætu sameinast. En samkeppnislögin eru bara með þeim hætti að það myndi ekki ganga.“ Þetta sagði Úlfar Steindórsson, stjórnarformaður Icelandair, þegar hann var spurður um hugsanlega sameiningu Icelandair og WOW air í viðtali við Viðskiptablaðið í ágúst síðastliðnum. Í gær var greint frá því að Icelandair myndi kaupa WOW air.

Hann sagði fleiri þætti hafa áhrif á það að félögin gætu ekki sameinast:

„Samt er stærsti hluti af starfsemi beggja fyrirtækja á markaðnum frá Evrópu til Ameríku og Ameríku til Evrópu. Samtals erum við með um 3% hlutdeild svo ekki erum við með ráðandi hlutdeild þar, heldur er það umferðin til og frá Íslandi sem veldur því að það gengur ekki upp,“ sagði Úlfar.

Í bréfi sem Skúli Mogensen til starfsmanna í gær sagði hann að kaupin væru bundin ákvörðun hluthafa Icelandair Group sem og samþykkis Samkeppniseftirlitsins. Það ferli mun taka rúmlega þrjár vikur.

Björgólfur Jóhannsson talaði á sömu nótum og Úlfar þegar hann var í viðtali í Kastljósi í lok ágúst. Björgólfur hætti sem forstjóri Icelandair Group tveimur dögum fyrir viðtalið. „Í fyrsta lagi reikna ég ekki með því að það sé heimilt. Ég held að starfsmenn ákveðinnar skrifstofu í Borgartúninu hafi skoðun á því ef að það kæmi til tals. Ég sé það ekki alveg fyrir mér.“

Ekki náðist í Úlfar Steindórsson við vinnslu fréttarinnar.