Rit Michaels Wolff um Donald Trump veldur meiri usla en nokkur pólitísk bók í langan tíma. Bókin nefnist Fire and Fury og kemur út í dag. Þarna er lýst furðulegu og gjörsamlega óforsetalegu háttarlagi Trumps. Kvenfyrirlitningin, hleypidómarnir og duttlungarnir eru alltaf til staðar, en í grein í New York Times leggur Michelle Goldberg út af bókinni og segir að í heimi forsetans, Trumpheimnum, viti allir samstarfsmenn hans að hann sé idjót. Fábjáni er líklega íslenska orðið. Þeir séu 100 prósent vissir um að hann ráði ekki við þetta.

Ef Bandaríkin lifi af Trumptímann, þá stefni í stórt uppgjör, miklu stærra en það sem hefur farið fram gagnvart Harvey Weinstein og slíkum kónum. Bók Wolffs sýni að Trump sé algjörlega gagnslaus, hann hafi enga getu til að leggja mat á upplýsingar eða skilja orsakir og afleiðingar. Hann sé álíka líklegur til að vinna þjóð sinni gagn og köttur sinni uppvaski  á heimili manns. En einn angi þessa sé að þeir sem halda honum við völd hafi engar slíkar afsakanir. Goldberg segir að þetta fólk sé í raun landráðamenn. Það stofni Bandaríkjunum í hættu með því að segja ekki upphátt sannleikann um forsetann.