Brynjar Níelsson, þingmaður Sjálfstæðisflokksins, gerir fjölmiðlaskýrsluna svokölluðu að umtalsefni sínu í stöðuuppfærslu á Facebook í dag.

„Nú er verið að ræða alvarlega að skattgreiðendur leggi til fjármuni til að styrkja stöðu einkarekinna fjölmiðla. Nú þegar leggja skattgreiðendur til vel á fimmta milljarð í fjölmiðlarekstur. Að vísu fara allir þeir fjármunir í einn fjölmiðil. Sjálfur er ég ekki fráhverfur því að styrkja íslenskt menningarefni í ljósvakamiðlum. En af hverju það verður að gerast í gegnum einn miðil í eigu ríkisins verður sífellt erfiðara að skilja. Kannski voru einhvern tíma rök fyrir því en sá tími er löngu liðinn,“

segir Brynjar.

Í tillögum fjölmiðlanefndar er meðal annars kveðið á um endurgreiðslu á hluta af kostnaði sem til fellur framleiðslu á fréttum og fréttatengdu efni, um allt að 25 prósentum, háð skilyrðum. Þá er einnig lagt til að RÚV hverfi af auglýsingamarkaði.

Brynjar segist  vilja styðja við fjölmiðlarekstur, en þá með þeim hætti að sambærileg fjárhæð verði dregin af útvarpsgjaldi RÚV, þannig að ekki verði ríkisútgjöld aukin með styrkingu fjölmiðla.

Leggur hann til að allt útvarpsgjaldið renni í sameiginlegan sjóð sem allir gætu sótt í til gerðar menningarefnis:

„Sjálfur mun ég ekki styðja aukin útgjöld úr ríkissjóði í fjölmiðlarekstur. Ef styðja á við einkarekna fjölmiðla verður að draga sambærilega fjárhæð frá útvarpsgjaldinu til ríkismiðilsins. Sjálfur teldi ég best að allt útvarpsgjaldið færi í sérstakan sjóð þar sem allir á markaði sem vildu búa til íslenskt menningarefni gætu sótt í.“