Samtök ferðaþjónustunnar mótmæla harðlega nýstaðfestum hækkunum þjónustugjalda í Vatnajökulsþjóðgarði og á Þingvöllum sem sagðar eru án fyrirvara og án nokkurs samráðs við samtökin. Þetta kemur fram í tilkynningu.

„Nýtilkynntar hækkanir á þjónustugjöldum innan Vatnajökulsþjóðgarðs ná allt að 80% og sýna algert skilningsleysi á starfsumhverfi og markaðsaðstæðum ferðaþjónustuaðila. Skammt er síðan þjónustugjöld innan þjóðgarðsins á Þingvöllum voru hækkuð um allt að 50% og í báðum tilfellum er tilkynnt um hækkanirnar fyrirvaralaust og án samráðs við hagsmunaaðila. Það er með öllu ótækt að slíkar hækkanir séu tilkynntar fyrirvaralaust á sama tíma og samráðshópur ríkisstjórnarinnar, SAF og Sambands íslenskra sveitarfélaga um heildargreiningu á, og framtíðarskipan gjaldtöku opinberra aðila af ferðaþjónustu er að störfum á vettvangi Stjórnstöðvar ferðamála. Eðlilegt er að öllum ákvörðunum um hækkun gjalda eða nýja gjaldtöku á vettvangi ferðaþjónustu sé frestað a.m.k. þar til tillögur samráðshópsins liggja fyrir,“

segir í tilkynningu.

Þá er minnt á að ríkisstjórnin hafi lagt áherslu á aukið samráð og samtal um málefni ferðaþjónustunnar, í stjórnarsáttmála og í samskipum sínum við SAF, en aðgerðirnar gangi gegn þerri stefnu:

 „Fyrrnefndar hækkanir, aðdragandi þeirra og staðfesting er í fullkomnu ósamræmi við þá stefnu. Í ljósi alls þessa er það eðlileg krafa SAF að viðkomandi hækkanir á gjaldskrám þjónustugjalda í Vatnajökulsþjóðgarði og á Þingvöllum verði dregnar til baka og öllum sambærilegum áformum frestað um óákveðinn tíma á meðan áhersla er lögð á það samráð um heildarskipan gjaldtöku af ferðaþjónustu sem þegar er hafið.“