Samkvæmt öruggum heimildum DV hafa fulltrúar Sjálfstæðisflokksins og Framsóknarflokksins náð samkomulagi um að mynda meirihluta í bæjarstjórn Kópavogs næstu fjögur árin. Tilkynning þess efnis er væntanleg um helgina. Ármann Kr. Ólafsson, oddviti Sjálfstæðismanna, mun áfram gegna embætti bæjarstjóra Kópavogs en Birkir Jón Jónsson, oddviti Framsóknarflokksins, verður formaður Bæjarráðs.

Á síðasta kjörtímabili var Sjálfstæðisflokkurinn í meirihlutasamstarfi við Bjarta framtíð í Kópavogi en oddviti flokksins, Theodóra S. Þorsteinsdóttir, sat í bæjarstjórn fyrir hans hönd. Í nýafstöðnum kosningum bauð Björt framtíð fram sameiginlegan lista með Viðreisn og var Theodóra oddviti hins nýja framboðs. 

Í viðtölum við Theodóru hefur greinilega komið fram að hún telji að meirihlutinn hafi haldið velli. Samkvæmt heimildum DV deila þó margir Sjálfstæðismenn ekki þeirri skoðun hennar. Samherjinn er ekki lengur sá sami að þeirra mati.

Samkvæmt sömu heimildum hefur samstarf Ármanns og Theodóru gengið vel. Theodóra var áfjáð í að halda því áfram og Ármann var jákvæður fyrir því.

Það sama gilti þó ekki um fulltrúaráð Sjálfstæðisflokksins í bænum og aðra bæjarfulltrúa flokksins. Meðal þeirra er Theodóra ekki vel liðin en hún þykir vera klaufaleg í mannlegum samskiptum.

Þá hafi mörgum gramist sú staðreynd að hún hafi dregið í rúmt ár að draga sig úr nefndum og ráðum bæjarins, á meðan hún sat bæði í bæjarstjórn og þingi, eins og hún hafði lofað.

Kornið sem fyllti loks mælinn voru viðbrögð Theodóru við umdeildri launahækkun bæjarstjórans. Hélt hún því fram að hún hefði verið á móti hækkuninni og greint frá þeirri skoðun sinni “bak við tjöldin” en endingu greitt atkvæði sitt með tillögunni sem samþykkt var einróma.

Þetta túlkuðu margir Sjálfstæðismenn sem svik og varð til þess að litið var til annarra valkosta.