Póst- og fjarskiptastofnun vill ekki gefa Reykjavíkurborg leyfi til þess að senda hópskilaboð á unga kjósendur fyrir næstkomandi sveitastjórnarkosningar, með því markmiði að örva þau til aukinnar kjörsóknar. Frá þessu er greint á RÚV.
Slíkt athæfi er venjulega bannað, en borgin sótti um undanþágu, sem Póst- og fjarskiptastofnun taldi ekki vera í sínu valdi að veita heldur vísaði þess í stað á Persónuvernd, sem hafi meira með slík mál að gera, en ekki má senda slík skeyti til markaðssetningar, nema viðtakandinn hafi samþykkt að veita þeim viðtöku fyrirfram.
Viðleitni Reykjavíkurborgar er með því augnamiði að auka kjörsókn ungmenna. Í sveitastjórnarkosningunum árið 2014 var kjörsókn alls 62,6 prósent. Árið 2010 var hún 73,4 prósent og 2006 77 prósent. Árið 2002 var hún 83,9 prósent.
Í síðustu kosningum kusu aðeins 45 prósent ungmenna á aldrinum 18 til 9 ára og 42 prósent 20-24 ára.
Má því fullyrða að kjörsókn fari almennt hrakandi, sem hlýtur að teljast áhyggjuefni. Reykjavíkurborg greip því til þessa aðgerða, í samvinnu með Háskóla Íslands, til að rannsaka hvað lægi að baki lítilli kjörsókn ungmenna og hvaða þættir skiptu máli fyrir kjörsókn.
Reykjavíkurborg var gefin kostur á að andmæla ákvörðun Póst- og fjarskiptarstofnunar og hafði til þess frest til 7. maí, en hann var ekki nýttur.