Björn Leví Gunnarsson, þingmaður Pírata, talar fallega um fyrrverandi fjármálaráðherra, Benedikt Jóhannesson, í opinskárri og einlægri Facebookfærslu í dag. Segir hann Benedikt hafa gert „fína“ hluti og hafi verið „ljósárum“ betri en núverandi ráðherra, Bjarni Benediktsson. Hann gengur jafnvel svo langt að segja að Benedikt hefði getað orðið besti fjármálaráðherra sögunnar:
„Benedikt gerði fína hluti sem ráðherra og er ljósárum betri en núverandi ráðherra. Ég skal meira að segja taka að hluta til undir lof þingmanna viðreisnar á störf hans, heilt kjörtímabil af fleiri gagnsæismálum hefðu held ég gert hann að besta fjármálaráðherra sögunnar ef önnur mál myndu ganga vel á sama tíma.
Nóg um það, eitt sem hann sá kannski ekki er að það er líka leikrit í nefndum. Stundum er nefndarstarfið bara að vinna sig í gegnum tékklista af „umsagnir bárust, gestir komu, en það skiptir ekki máli hvað þau segja við afgreiðum (eða ekki) málið óháð því“.
En Benedikt mætti í þingsal, svaraði spurningum og gerði það hrokalaust og af fagmennsku en ekki pólitík (jú, kannski smá pólitískri hugmyndafræði). Ég sakna þess úr embætti fjármálaráðherra,“
segir Björn Leví.
Benedikt greinir frá því í Kjarnanum að Viðreisn hafi misst tökin í þeirri atburðarrás sem hófst í kjölfar þess að Björt framtíð sleit ríkisstjórnarsamstarfinu á síðasta ári og er færsla Björns Leví skrifuð við þá frétt.
