Styrmir Gunnarsson, fyrrum ritstjóri Morgunblaðsins, segir að Katrín Jakobsdóttir forsætisráðherra hafi sýnt skynsemi er hún boðaði forystumenn launþegahreyfingarinnar til sín í gær. Hann segir hana þó ekki átta sig á kjarna málsins þegar kemur að Kjararáði og verkalýðshreyfingunni:

 „Það var skynsamlegt hjá Katrínu Jakobsdóttur, forsætisráðherra, að boða forystumenn launþegahreyfingarinnar til fundar við sig í gær, eftir að ljóst var orðið að ASÍ mundi ekki taka sæti í Þjóðhagsráði. En mikil áherzla forsætisráðherra í samtali við RÚV í gærkvöldi á að framundan væri gjörbreyting á lögum um Kjararáð bendir til þess að Katrín átti sig ekki á kjarna málsins. Þær lagabreytingar munu ekki friða verkalýðshreyfinguna.“

Styrmir rekur þá ólgu sem ákvarðanir Kjararáðs hafa skapað:

„Það eru ákvarðanir Kjararáðs síðustu misseri, sem hafa skapað þá ólgu, sem er orðin innan verkalýðsfélaganna og er að verða á vinnumarkaði almennt. Alls staðar finna menn fyrir þrýstingi frá launþegum um launahækkanir vegna þess samanburðar, sem ákvarðanir Kjararáðs um launahækkanir æðstu embættismanna, þingmanna og ráðherra hafa leitt af sér. Við bætist svo að sama fólki er ofboðið vegna launakjara æðstu stjórnenda fyrirtækja, sem lífeyrissjóðir landsmanna eru nú stærstu eigendur að. Þessi afstaða kemur m.a. fram í atkvæðagreiðslu meðal grunnskólakennara, sem kolfelldu kjarasamning. Að óbreyttu fer hér allt á hvolf á vinnumarkaði á næsta ári.“

Að lokum segir Styrmir að stjórnarsamstarfið verði erfitt fyrir VG í framhaldinu þar sem bakland flokksins muni rísa upp.