Halla Gunnarsdóttir hefur verið ráðin ráðgjafi forsætisráðherra. Halla mun leiða starf stýrihóps um heildstæðar úrbætur að því er varðar kynferðislegt ofbeldi. Meginhlutverk hópsins er að beita sér fyrir framsæknum og samhæfðum aðgerðum stjórnvalda gegn kynferðislegu ofbeldi og kynferðislegri og kynbundinni áreitni og að Ísland sé í fremstu röð í baráttunni gegn hvers kyns kynbundnu ofbeldi.

Halla hefur víðtæka reynslu af mannréttindamálum og baráttunni gegn kynbundnu ofbeldi og áreitni. Hún starfaði áður sem skrifstofustjóri hjá breska Kvennalistanum (The Women’s Equality Party) þar sem hún leiddi stefnumótun samtakanna. Þá starfaði Halla á alþjóðlegri lögmannsstofu í Lundúnum, McAllister-Olivarius, sem sérhæfir sig í málum sem lúta að kynbundinni áreitni á vinnustöðum, innan menntastofnana og á internetinu.

Á árunum 2009-2013 var Halla aðstoðarmaður Ögmundar Jónassonar, innanríkisráðherra og heilbrigðisráðherra, þar sem hún leiddi m.a. samráð um meðferð nauðgunarmála og hafði frumkvæði að vitundarvakningu um kynferðislegt, andlegt og líkamlegt ofbeldi gegn börnum sem var skipulögð í
samstarfi velferðarráðuneytis, innanríkisráðuneytis og mennta- og menningarmálaráðuneytis.

Halla er fyrrum blaðamaður og hefur verið virk í baráttunni gegn kynbundnu ofbeldi um langa hríð, þar á meðal á vettvangi Femínistafélags Íslands.

Halla hóf störf 1. mars og mun hafa aðsetur í forsætisráðuneytinu.