UTmessan (upplýsingartækni) var haldin á föstudag og laugardag en þetta var í áttunda sinn sem tölvugeirinn opnar heim sinn uppá gátt og sýnir það helsta sem er í gangi í tækniheiminum. Uppselt var á ráðstefna fyrir tölvufólk eins og fyrri ár en rúmlega þúsund gestir voru á ráðstefnudeginum. Þar voru haldnir tæplega 50 fyrirlestrar í öllum ráðstefnusölum Hörpu og gátu ráðstefnugestir valið sér fyrirlestra eftir áhugasviði. Tólf erlendir fyrirlesarar stigu á stokk og fræddu sérfræðinga í tölvugeiranum um það helsta sem er að gerast úti í heimi. Óvenjumargar konur héldu fyrirlestur að þessu sinni, eða um 40% fyrirlesara en eitt af markmiðum UTmessunnar er að vekja athygli á því hve fjölbreytt starfssvið tölvufólks er og að það henti öllum, óháð kyni.
UTmessan hefur fest sig í sessi sem einn helsti vettvangur fyrirlestra, umræðna, skoðanaskipta og nýjunga í tölvugeiranum á Íslandi og endurspeglar mikilvægi tölvutækninnar í daglegu lífi okkar allra. Þar er jafnframt að finna umfangsmikið og fjölbreytt sýningarsvæði þar sem öll helstu tölvu- og tæknifyrirtæki landsins sýna framtíðina í tækjum og vörum sem ætíð vekja mikla athygli og er fjölsótt. Á síðustu árum hefur UTmessan í auknum mæli orðið sá staður þar sem íslenskir og erlendir sérfræðingar kynna það helsta í þessum geira og endurspeglar hún þann fjölbreytileika, framþróun og möguleika sem upplýsingatæknin býr yfir.
Að sögn Arnheiðar Guðmundsdóttur, framkvæmdastjóra Ský og UTmessunar, vakti gervigreind og sýndarveruleikatæknin mikinn áhuga:
„Þetta er það sem er þegar byrjað að hafa áhrif á okkar daglega líf og mun þáttur þess aðeins aukast í náinni framtíð. Sjálfkeyrandi bílar byggja til dæmis á gervigreind, sem byggist á því að taka ákvarðanir útfrá gefnum upplýsingum og sýndarveruleikinn er svo miklu meira en bara tölvuleikir. Til dæmis er Marel að notast við sýndarveruleikatækni til að prófa nýja framleiðslu og aðrir sem nota þetta í praktískum tilgangi,“
segir Arnheiður.
Sýningardagur UTmessunnar var á laugardeginum og rétt eins og fyrri ár var þar stöðugur straumur gesta allan daginn. Rúmlega 11 þúsund gestir létu sjá sig á sýningunni, sem haldin er árlega af Ský, fagfélagi tölvufólks með dyggum stuðningi háskólanna og fyrirtækjum tengdum tölvu- og tæknigeiranum á Íslandi. UTmessan 2019 verður 8. og 9. febrúar og undirbúningur undir hana þegar hafinn.
