Frakkar sem búa á Íslandi kusu flestir Emmanuel Macron eða Jean Luc Mélenchon. Þetta má lesa á vefsvæði stórblaðsins Le Monde en þar er unnið úr kosningagögnum frá franska innanríkisráðuneytinu. Macron fékk 77 atkvæði kosningunni í Reykjavík, Mélenchon 69 atkvæði, Benoit Hamon 29 atkvæði, Francois Fillon 14 atkvæði en Marine Le Pen aðeins 11 atkvæði.
Upplýsingarnar eru birtar svona á vef Le Monde, þar má líka sjá prósentutölurnar.
Svo er nokkuð athyglisvert í þessu sambandi hvernig staðið er að utankjörstaðaatkvæðagreiðslu. Á Facebook bendir Jóhannes Hraunfjörð Karlsson, sem hefur verið búsettur í Frakklandi, á eftirfarandi:
Tekurðu eftir muninum á kosningaframkvæmdinni? Franska sendiráðið sér um að menn kjósi og síðan telur það atkvæði og birtir tölfræðina en þetta gerir hvert bæjarfélag fyrir sig þar. Íslenska sendiráðir sér ekki einu sinni um að senda atkvæðið fyrir þig til Íslands, m.ö.o., ef póstþjónustan nennir ekki að bera út atkvæðið þitt tímanlega glatast það.
