Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi, fyrrum LÍÚ, hellir olíu á eld deilna um sjávarútveg með því að segja á sama degi og útgerðarrisinn HB Grandi tilkynnir um þau áform að loka fiskvinnslunni á Akranesi. Þetta gerir hún með þeirri yfirlýsingu að komi til greina að flytja fiskvinnslu úr landi vegna gengisþróunar.
Við þetta er eitt og annað að athuga. Það má vitna í lög um fiskveiðistjórnun nr. 116/2006. Þar segir í fyrstu greininni:
1. gr.:
Nytjastofnar á Íslandsmiðum eru sameign íslensku þjóðarinnar. Markmið laga þessara er að stuðla að verndun og hagkvæmri nýtingu þeirra og tryggja með því trausta atvinnu og byggð í landinu. Úthlutun veiðiheimilda samkvæmt lögum þessum myndar ekki eignarrétt eða óafturkallanlegt forræði einstakra aðila yfir veiðiheimildum.
Lögmaðurinn Sveinn Andri Sveinsson leggur út af þessu á Facebook og segir:
Ef handhafar aflaheimilda hagnýta ekki hinar úthlutuðu aflaheimildir í samræmi við tilgang laganna, þá ætti Fiskistofa að geta lokað á úthlutun aflaheimilda til viðkomandi. Og ef þetta er svona mikið vesen þá er miklu betra bara að hætta útgerð og þessu harmakvæli og leyfa öðrum sem eru tilbúnir að veiða fiskinn í sjónum og vinna hann fá aflaheimildirnar.
