Þessi ljósmynd er tekin 1903 og sýnir hluta af Þingholtunum og Skólavörðuholtið. Lengst í burtu glittir í Bláfjöllin. Höfundurinn er hinn merki ljósmyndari Magnús Ólafsson. Myndin er tekin yfir Tjörnina, væntanlega úr Tjarnarbrekkunni, það er hávetur eins og sjá má.

Þarna er afar lítið orðið til af byggðinni sem síðar hefur risið. Við þekkjum Miðbæjarskólann sem var byggður 1898, nokkur hús við Miðstræti og Þingholtsstræti, Landshöfðingjahúsið (Næpuna), við sjáum drög að götunni sem nefnist Skálholtsstígur og eitt hús við Laufásveg.

Fríkirkjan er nýrisin þegar myndin er tekin, hún var vígð snemma árs 1903 en fáum árum síðar var kirkjubyggingin lengd. Efst á hæðinni sjáum við Skólavörðuna. En gatan neðst, þar sem nú er Sóleyjargata, er ekki nema slóði.

Við tökum eftir því hversu Skólavörðuholtið er grýtt. Nú er holtið fullbyggt, en áður var þarna grjót og urð og erfitt yfirferðar. Myndin sýnir glöggt hvílíkur berangur Reykjavík var á árum áður. Það er ekki mikið skjól að sjá.