Frakkar ætla að banna snjallsíma í skólum frá og með skólaárinu sem hefst í september næstkomandi. Þetta gildir í kennslustundum, en líka í frímínútum, í matarhléum og milli kennslustunda. Þetta var eitt af því sem Emmanuel Macron forseti ræddi um í kosningabaráttu sinni fyrr á þessu ári.

Menntamálaráðherrann franski, Jean-Michel Blanquer, segir að börn séu hætt að leika sér í frímínútum. Þau hangi í símumum, frá uppeldislegu sjónarmiði sé það mikið vandamál.

Hugmyndin er að börn og unglingar skilji símana eftir áður en skólinn hefst. Samtök kennara hafa áhyggjur af því að erfitt geti reynst að framfylgja banninu og eins og tryggja að nemendurnir fái símana aftur að skóladegi loknum. Til þess þarf væntanlega að útbúa sérstakar hirslur.

Á vef World Economic Forum er stutt myndband um bannið en þar er einnig vitnað í rannsókn sem segir að nemendur í skólum þar sem snjallsímar eru ekki í höndum þeirra standi betur að vígi.

Það fylgir einnig fréttum um bannið að efla eigi kórstarf í skólum í Frakklandi – fjölga kórum sem þar starfa.

Er kannski kominn tími til að huga að svona banni í íslenska skólakerfinu? Hvað segir nýi menntamálaráðherrann?