Hérna sjást valdahlutföllin í Palestínu. Ísraelar stela öllu sem þeir geta stolið að hætti nýlenduþjóðar. Drengurinn á myndinni var sakaður um að henda steinum – takið eftir, henda steinum. Það eru vopn hans. Reyndar segir önnur saga að hann hafi einfaldlega verið á leiðinni út í búð.

Það þarf 23 ísraelska hermenn, gráa fyrir járnum, með hjálma og í hlífðarbúningum til að taka þennan pilt, berja hann, niðurlægja, binda fyrir augun á honum og leiða hann í fangelsi.

Það er satt að segja ekki mikill manndómur yfir þessum köppum. Strákurinn er 14 ára. Þetta er í borginni Hebron en þar hafa landránsmenn yfirtekið miðbæinn, girt hann af og eignað sér. Svona rétt eins og fjandsamlegt herlið tæki yfir Kvosina í Reykjavík, reisti víggirðingar, hleypti okkur ekki inn – en væri um leið með sífelldar ögranir.