Í dag, 7. nóvember, eru liðin 100 ár frá rússnesku byltingunni. Það voru reyndar tvær byltingar árið 1917, febrúarbyltingin sem leiddi til þess að keisarinn var settur af og októberbyltingin, en svo hefur valdarán bolsévíka verið kallað.

Vegna mismunar á tímatali er febrúarbyltingin reyndar í mars, upphaf hennar er talið vera 8. mars þegar voru miklar mótmælagöngur í Petrograd eins og borgin hét þá. Má segja að það hafi verði sönn uppreisn alþýðunnar – með mikið af konum í fararbroddi. Og októberbyltingin var semsagt í nóvember.

Hér er nokkuð áhugaverður spurningaleikur þar sem er spurt: Hver ert þú í Rússlandi 1917? Maður svarar spurningum og fær niðurstöður, hvort maður er bolsévíki, mensévíki, þjóðbyltingarmaður ellegar keisarasinni og þá kannski í sveit hvítliða.

Sjálfur fékk ég þessa niðurstöðu. Ég virðist vera langt frá öllum stjórnmálaöflum Rússlands á þessum tíma – sem er líklega ágætt. Ég get sætt mig við það. Það er ekki hægt að endurskrifa söguna, en Kerenskí hefði mátt hanga lengur á völdunum. Með því hefðu bjargast ótalin mannslíf.

Það þarf að gæta þess þegar niðurstöðurnar eru skoðaðar að bolsévíkar drápu alla hina hópana sem sjást á kortinu og fóru svo að drepa hver annan.