Maður þráði að smakka Jolly Cola eins og margt annað sem var auglýst í Andrésblöðunum og fékkst ekki á Íslandi (kókómjólk, saltlakkrís). Svo kom sending af því í eina af fjölmörgum búðum sem voru í Vesturbænum – þær voru þrjár í 30-40 metra radíus frá heimili mínu.

Það er skemmst frá því að segja að Jolly Colað olli miklum vonbrigðum – það var ekki gott á bragðið.

Þetta var tíminn áður en við gengum í EFTA og hér fór að fást erlent sælgæti. Það sá maður í hillingum – það voru helst menn sem voru í siglingum sem gátu flutt það til landsins. Líklega taldist það vera smygl. Jolly Colað var danskt að uppruna, en var framleitt um hríð á Akureyri ásamt með Valash, Mix-i og sykurlausu Valash – þar var mikið brautryðjendastarf í sykurskertum drykkjarvörum. Þetta má sjá auglýsingunni frá Sana hér að neðan.

Svo fórum við í EFTA og ótalmargt sem Íslendingar höfðu fengist við lagðist af með stórauknum innflutningi, eins og húsgagnasmíði, fatasaumur og skógerð, en sælgætið fékk einhvern aðlögunartíma, ef ég man rétt. Það var svo nokkuð sérstakt að eftir hrunið, þegar gengi erlendra gjaldmiðla varð mjög hátt, efldist aftur íslensk sælgætisgerð og horfnar gotterístegundir komu á nýjan leik á markað.

En Jolly Cola hef ég ekki smakkað í marga áratugi. Rétt er að taka að það er borið fram eins og jollí en ekki upp á ensku sem væri þá djollí.