Leiðtogi einhverrar elstu stofnunar í heimi er staddur á Íslandi núna. Það er patríarki grísku rétttrúnaðarkirkjunnar, Bartólómeus I. Hann er hinn 270ti í röð patríarkanna, en patríarkinn er erkibiskup í Konstantínópel – sem nú heitir Istanbúl. Samkvæmt hefð er embættið rakið allt aftur til postulans Andrésar. Patríarkarnir hafa verið í borginni síðan á tíma Konstantínusar mikla sem stofnaði aðra höfuðborg Rómaveldis og gaf henni nafn sitt. Þetta varð síðar austur-rómverska ríkið, öðru nafni Býsansríkið. Það stóð fram til 1453 þegar Tyrkir lögðu undir sig Konstantínópel.

En patríarkinn hélt áfram að vera í borginni, enda bjuggu Grikkir þar þótt svokallaðir Ottómanar hefðu tekið völdin. Nú eru bækistöðvar patríarkans í húsaþyrpingu í hverfi sem nefnir Fener – langflest grísku sóknarbörnin eru horfin á braut, þau voru flæmd burt í þjóðernisátökum 20. aldar, en patríarkinn er þar ennþá og telst vera „fremstur meðal jafningja“ í grísku kirkjunni.

Reglur kveða á um að hann skuli vera tyrkneskur þegn og starfa eftir tyrkneskum lögum, Bartólómeus þurfti meira að segja að gegna þjónustu í tyrkneska hernum.

Meðal Grikkja hefur lifað draumurinn um að endurheimta Konstantínópel, þeir reyndu það í stríði á árunum 1919-1922, en það endaði með skelfingu og gagnkvæmum þjóðernishreinsunum. Þessir draumar lifa enn í kvæðum og söngvum, en sem betur fer álíta flestir Grikkir þá vera óraunhæfa óra.

Bartólómeus er hingað kominn til að ávarpa ráðstefnuna Arctic Circle. Hann hefur látið sér umhverfismál varða og fengið heitið „græni patríarkinn“. Bartólómeus hefur verið patríarki síðan 1991, er vinsæll og virtur og hefur beitt sér fyrir samtali milli ólíkra trúarbragða.

Hann heldur gríska messu í Hallgrímskirkju á morgun klukkan 9.30.