Pauline Hanson þingmaður á ástralska þinginu mætti í dag til þingfundar klædd í svarta búrku. Hún sat í þessum klæðnaði í þingsalnum í tæpar tuttugu mínútur meðan umræður fóru fram um það hvort búrkur skyldu leyfðar sem klæðnaður á almannafæri í Ástralíu.

Hanson er formaður stjórnmálaflokksins One nation [Ein þjóð] en sá flokkur er þekktur fyrir andstöðu sína gegn innflytjendastefnu stjórnvalda og gagnrýni á íslam.

George Brandis dómsmálaráðherra tók til máls og fordæmdi þá hegðun þingmannsins að mæta til fundar í búrku. Hann sagði að ástralska ríkisstjórnin ætlaði ekki að banna búrkur.

Ég vil með virðingu aðvara þig Hanson þingmaður, að fara mjög, mjög varlega með tilliti til þeirra smánunar sem þú kannt að valda gagnvart trúarkennd annarra Ástrala. Um hálf milljón Ástrala er íslamstrúar og yfirgnæfandi meirihluti þeirra eru löghlýðnir og góðir Ástralir.

Gerningur Paulin Hanson olli uppnámi í þinginu og kveikti heitar umræður. Sjálf hefur hún sagt að banna eigi búrkur meðal annars af öryggisástæðum þar sem þær hylji andlit fólks.

Forseta ástralska þingsins þótti ástæða til að taka fram að gengið hefði verið úr skugga um að þetta væri þingmaðurin Pauline Hanson í búrkunni áður en hún gekk inn í þingsalinn.

Hér fyrir neðan má sjá myndband af þingfundinum: