Svandís Svavarsdóttir skrifar grein á vef Kjarnans þar sem hún fjallar um stöðu Bjartrar framtíðar í ríkisstjórninni með Sjálfstæðisflokknum og Viðreisn. Ætlar Björt framtíð að þola þetta? spyr Svandís í fyrirsögn og segir svo í lok greinar:

Björt fram­tíð hefur val um að styðja áfram­hald­andi hægripóli­tík og svelti­stefnu eða kanna aðra kosti fyrir umhverf­is- og nátt­úru­vernd, rétt­lát­ara sam­fé­lag, jöfnuð og almennt opin­bert heil­brigð­is- og mennta­kerfi fyrir alla.

Björt framtíð getur semsagt kannað aðra kosti, segir Svandís. Það var reyndar gert eftir kosningarnar, þá tókst ekki að mynda ríkisstjórn fyrr en eftir meira en sjötíu daga. Það hefur meira að segja verið upplýst af Kristjáni Guy Burgess, fyrrverandi framkvæmdastjóra Samfylkingarinnar, í grein í Skírni að þreifingar hafi verið milli fjórflokksins, Sjálfstæðisflokks, VG, Samfylkingar og Framsóknar.

En ef Björt framtíð ætti að fara að yfirgefa ríkisstjórnina þyrfti hún væntanlega að slíta bandalaginu við Viðreisn. Og aðra ríkisstjórn væri ekki hægt að mynda nema með aðkomu Framsóknar.

Ég spurði Svavar Gestsson, áhrifamann í VG og föður Svandísar, á Facebook hvort Framsókn hlyti ekki að vera með í slíkri stjórn og hann svaraði stutt og laggott:

Já.

Það hefur raunar vakið athygli í þinginu hversu gott samstarf virðist nú vera milli VG og Framsóknar. Liðinn er tími tortryggni og andúðar sem var þegar Sigmundur Davíð og Steingrímur J. leiddu þessa flokka. Katrín Jakobsdóttir er í góðu sambandi við Sigurð Inga Jóhannsson og enn betra við Lilju Alfreðsdóttur.

Miðstjórnarfundur er hjá Framsóknarflokknum nú um helgina. Stuðningsmenn Sigmundar Davíðs hafa aðeins látið í sér heyra fyrir fundinn – þar eru greinilega enn mikil sárindi og er jafnvel talað um klofning. Þó er varla líklegt að þeir láti til skarar skríða á fundinum – eða hafi yfirleitt styrk til þess.