Rússar eru langt á undan Bandaríkjamönnum þegar kemur að nýtingu skipaleiða og auðlinda á norðurslóðum. Sagði Paul Zukunft aðmíráll og yfirmaður bandarísku strandgæslunnar á fundi alþjóðaskipulagstofnunarinnar CSIS að þegar hnattræn hlýnun opnar á siglingaleiðir á norðurslóðum geti það komið Bandaríkjunum í opna skjöldu og það gæti þurft heila kynslóð af uppbyggingu til að ná Rússum og Kínverjum. Greint er frá þessu á vef Foreign Policy.

Sjá frétt: Málþingið Friður og öryggi á norðurslóðum haldið á morgun

Til dæmis séu Rússar nú með rúmlega 40 ísbrjóta til að búa til skipaleiðir, en Bandaríkin aðeins þrjá. Að sama skapi er tækjabúnaðurinn gamall, stærsti ísbrjótur Bandaríkjamanna er Polar Star, skip sem var byggt á áttunda áratug síðustu aldar:

Að vera einungis með einn stóran ísbrjót, það er eitthvað sem ég missi svefn yfir,

sagði Zukunft. Um er að ræða mikla hagsmuni líkt og við Íslendingar þekkjum, milljarðahagsmunir í hugsanlegri námuvinnslu fyrir utan birgðir af olíu og gasi sem stórveldin eygja í að vinna síðar á öldinni. Telur Zukunft að bæði Rússar og Kínverjar ætli sér að vera fyrstir á staðinn:

„Rússar eru þegar farnir að sýna „ég kom fyrstur“ takta.“

Leggur Zukunft það til við Bandaríkjaþing að landhelgisgæslan fái fjármagn til að smíða sex nýja ísbrjóta fyrir árið 2023, en á sama tíma verða Rússar búnir að smíða tvo ísbrjóta til viðbótar, báðir verða vopnaðir flugskeytum. Vill Zukunft að skip Bandaríkjamanna verði jafn vel útbúin ef það kæmi til ryskinga á ísnum.

Magnus Nordenman yfirmaður öryggisstofnun Atlantshafsráðsins segir í samtali við FP að Rússar séu fyrst og fremst að hugsa um flotann í vestri:

Rússneski Kyrrahafsflotinn er talsvert rýr miðað við flotann í vestri. Uppbygging þeirra er ekki byggð á hernaði, heldur á efnahag, 20% af vergri landsframleiðslu þeirra kemur af norðurslóðum,

sagði Nordenmann. Zukunft hefur miklar áhyggjur af stöðunni í dag:

Þeir eru með alla taflmenn sína á borðinu, við erum kannski með hrók og peð. Ef þú lítur á heimskautasvæðið nú þá byrja þeir leikinn með skák og mát.