Marine Le Pen frambjóðandi þjóðernissinna í forsetakosningunum í Frakkandi var vinsælust meðal yngri kjósenda í fyrstu umferð kosninganna sem fram fór um síðustu helgi.
Könnun gerð meðal rúmlega níu þúsund kjósenda sýnir að Le Pen fékk flest atvæði kjósenda bæði í aldurshópunum 18 til 34 ára, og 35 til 49 ára. Le Pen var aðeins vinsælli meðal yngstu kjósendanna en Jean-Luc Mélenchon frambjóðandi yst af vinstri væng franskra stjórnmála. Norska fréttastofan NTB greinir frá þessari könnun OpinionWay og er fréttin birt í fjölda fjölmiðla í Noregi í dag.
Könnunin leiðir einnig í ljós að miðjumaðurinn Emmanuel Macron sem hlaut í heild flest atkvæði í fyrri umferðinni, hafi verið í öðru sæti í fyrri umferðinni meðal kjósenda á aldursbilinu 35 til 49 ára. Hann var með sama kjörfylgi og Le Pen í hópnum 50 til 64 ára en hafði hins vegar meira kjörfylgi en hún meðal elstu kjósendanna. Meðal hinna elstu var það þó hvorki Macron né Le Pen sem höfðu mest fylgi, heldur íhaldsmaðurinn Francois Fellon.
Le Pen var með yfirburðafylgi meðal kjósenda í lægri tekjuhópum, en Macron stakk af með vinninginn hjá hinum efnameiri. Könnunin sýnir einnig að 45 prósent kjósenda Sósíalistaflokksins kusu Macron á meðan um fjórðungur þeirra gaf Mélenchon atkvæði sitt.
Talið er að þessi könnun OpinionWay geti gefið vísbendingar um það hvernig seinni umferð forsetakosninganna fari nú þegar vika er til þess að kjörstaðir opni að nýju. Talið er að margir þeirra sem kusu frambjóðendur sem féllu út eftir fyrstu umferðina muni nú kjósa Marcron í seinni umferðinni. Nonna Mayer rannsóknastjóri við Sciences Po-stjórnmálafræðirannsóknastofnunina í París segir við NTB-fréttastofuna að Le Pen muni tapa í seinni umferðinni jafnvel þó helmingur kjósenda úr fyrri umferð kjósi að sitja heima. Hún telur að Marine Le Pen fái í hæsta lagi tíu milljónir atkvæða.
Það er samt geysimikið fylgi. En þó að bara helmingur kjósi, sem þó er mjög ósennilegt, þá fær hún samt sem áður aldrei meir en 42 prósent [greiddra atkvæða],
segir Mayer.
Skoðanakannanir benda til að Macron sé með um 60 prósenta fylgi í seinni umferð en Le Pen í kringum 40 prósent. Til að ná kjöri sem forseti Frakklands verður frambjóðandi að fá meira en helming greiddra atkvæða í seinni umferðinni.
