Deutsche Bank gæti flutt allt að 4.000 störf frá Bretlandi vegna Brexit. Þetta hefur Frankfurter Allgemeine Zeitung eftir Sylvie Matherat, yfirregluverði bankans. Þetta er í fyrsta sinn sem háttsettur starfsmaður bankans nefnir einhverja tölu um áhrif Brexit á starfsmannafjöldan hjá bankanum í Lundúnum. Matherat sagði þetta á ráðstefnu í Frankfurt á miðvikudaginn.

Hún sagði að fyrsta skrefið í þessu öllu væri að ESB og Bretland varpi skýrara ljósi á hverju bankinn má eiga von á í tengslum við Brexit. Þessi mál þurfa að skýrast sem fyrst að hennar mati enda um mikilvægt mál að ræða fyrir bankann og starfsmenn hans.

Hún sagði aðspurð að þeir starfsmenn sem sjá um mál viðskiptavina í ESB verði að vera staðsettir í ESB-ríki og því verði þeir að flytja til meginlandsins þegar Brexit tekur gildi. Í heildina eru þetta um 4.000 starfsmenn að hennar sögn.

Hún tók einnig fram að það yrði mikið högg fyrir Bretland að missa þessi 4.000 störf til meginlandsins en starfsmenn Deutsche Bank í Englandi eru 9.000, þar af 7.000 í Lundúnum.

Bandarískir bankar og bankar frá Evrópuríkjum, sem standa utan ESB, hafa notað Lundúni sem einhverskonar aðgangspunkt að Evrópumarkaðinum. Frankfurter Allgemeine Zeitung segir að það verði að öllum líkindum ekki hægt eftir að Brexit verður að veruleika.