Donald Trump gerir mikið mál úr að störf tapist í bílaframleiðslu og kolavinnslu. Störfin í kolavinnslu verða reyndar ekki endurvakin nema að litlu leyti, þar hefur sjálfvirkni tekið völdin eins og víðar og aðrir orkugjafar reynast hagkvæmari. En í kolaiðnaði vinna gjarnan hvítir karlar, markhópur Trumps.

En það er á öðrum stað í bandaríska hagkerfinu að störf eru að tapast með ógnarhraða. Það er í verslunargeiranum. Frá því síðasta haust hafa verslanakeðjur eins og Macy’s og J.C. Penneys lagt niður meira en 100 þúsund störf, samkvæmt grein sem birtist á vefritinu Salon eru það fleiri störf en í gervöllum kolaiðnaðinum.

Aðalástæðan fyrir þessu er stóraukin verslun á internetinu. Þar koma við sögu risafyrirtæki eins og Amazon. Mikið af þeirri verslun fer fram með sjálfvirkni, það skapast ekki ný störf í staðinn fyrir þau sem tapast. Það er talað um ekki svo fjarlæga framtíð þar sem verslunarkringlur- og hús Bandaríkjanna standa tóm.

En þeir sem þarna tapa vinnunni eru að miklu leyti konur og margar tilheyra minnihlutahópum. Áhugi Trumps á þeim er ekki ýkja mikill.