Nicola Sturgeon fyrsti ráðherra Skotlands hyggst fara fram á að haldin verði önnur þjóðaratkvæðagreiðsla um sjálfstæði Skotlands frá Bretlandi. Sturgeon vill að atkvæðagreiðslan fari fram einhvern tímann á tímabilinu frá hausti 2018 og fram að vori 2019. Sturgeon hyggst leggja málið fyrir skoska þingið í næstu viku og fara fram á heimild til að krefja breska þingið um atkvæðagreiðsluna.

Þetta kom fram í ræðu sem Sturgeon hélt í Edinborg nú fyrir skemmstu. Í ræðu sinni fjallaði hún um fyrirhugaða útgöngu Bretlands úr Evrópusambandinu. Hún lýsti því hvernig allar viðræður hennar við bresk stjórnvöld um leiðir til að Skotland gæti áfram verið partur af innri markaði Evrópusambandsins hefðu verið árangurslausar og tillögum hennar mætt með tómlæti. Mikill meirihluti Skota var andvígur útgöngu úr sambandinu þegar Brexit atkvæðagreiðslan fór fram.

Í breskum fjölmiðlum er bent á að það sé ekki skoska þingsins að taka ákvörðun um hvort þjóðaratkvæðagreiðslan fari fram. Til þess þurfi breska þingið að veita heimild. Sturgeon sagði aðspurð að hún teldi ekki líkur á að breska þingið neiti Skotum um heimild til þess.

Skotar felldu sjálfstæði árið 2014

Skotar héldu þjóðaratkvæðagreiðslu um sjálfstæði frá Bretlandi árið 2014. Niðurstaðan varð sú að 55 prósent vildu halda í ríkjasambandið en 45 prósent vildu sjálfstætt Skotland. Sturgeon sagði í morgun að uppi væri breytt staða eftir Brexit-atkvæðagreiðsluna. Að hennar mati sé ekki hægt annað en að halda atkvæðagreiðslu um sjálfstæði, annað þýddi einfaldlega að verið væri að samþykkja útgöngu Skotlands úr Evrópusambandinu, þvert á vilja mikils meirihluta þjóðarinnar. Aðspurð sagði Sturgeon að hún teldi að Skotar myndu samþykkja sjálfstæði í nýrri þjóðaratkvæðagreiðslu.