Hleypum öllu í bál og brand í Írak, Sýrlandi, Líbýu og Jemen. Látum rigna sprengjum, en pössum svo upp á að fólkið sem reynir að flýja ofbeldið komist hvorki lönd né strönd.

Allavega ekki til Bandaríkjanna sem bera mesta ábyrgð á endalausum ófriðnum – ásamt taglhnýtingum þeirra í Bretlandi.

Og þá er líka víst að flóttamannastraumurinn mun leita upp til Evrópu þar sem býr fólk sem seint verður kennt um þennan styrjaldarrekstur en þarf að súpa seyðið af honum. Til dæmis Grikkir.

Hins vegar skulum við hafa undanþegin lönd eins og Saudi-Arabíu og Egyptaland. Þar hefur reyndar verið gróðrarstía fyrir hryðjuverk, en harðstjórar í þessum löndum teljast vera mikilvægir bandamenn – og þar eru Trump-hótel.

Líklega hoppa Isis og Al-Queda af kæti í dag, enda markmið þessara samtaka að magna upp tortryggni og hatur. Þeim hefur aldeilis orðið ágengt. Þarna hafa þeir sannarlega fundið pópúlista til að stíga við sig skuggadansinn.

Tvískinnungurinn er himinhrópandi. 15 af 19 árásarmönnum 11. september 2001 voru frá Saudi-Arabíu. En það er ekki beint eins og ameríska meginlandinu sé ógnað að utan – líklega hefur það sjaldan verið öruggara. Aðalvandamálið þar er eins og lengi áður, bandarískir þegnar sem drepa hver aðra.