„Opinber matsskýrsla leyniþjónusta Bandaríkjanna um meint inngrip Rússa í forsetakosningarnar var að birtast. Hafi þessar þjónustur einhverjar sannanir fyrir því að Rússnesk stjórnvöld, jafnvel Pútín sjálfur, hafi fyrirskipað tölvuinnbrot hjá stjórnstöð Demókrata hefur alveg láðst að birta þær í þessari samantekt.“

Þetta segir Kristinn Hrafnsson, talsmaður Wikileaks og fv. fréttamaður. Tekur hann þar undir með Donald Trump, verðandi forseta Bandaríkjanna, sem hefur gert lítið hingað til úr fullyrðingum leyniþjónustustofnana Bandaríkjamanna um stórfelld inngrip rússneskra stjórnvalda í forsetakosningarnar í Bandaríkjunum í nóvember sl.

Rússar hafa verið sakaðir um að brjótast inn í tölvukerfi í Bandaríkjunum, m.a. hjá landsnefnd demókrataflokksins, og leka gögnum til Wikileaks í því skyni að láta Hillary Clinton líta illa út.

Óhætt er að segja að Kristinn gefi skýrslunni, sem kynnt var í Bandaríkjunm í gær, algera falleinkunn. Hann segir á fésbók:

„Hún er eiginlega hræðilega léleg lesning og stundum kjánahrollsvaki. Það er líklegast í tilefni dagsins sem CIA, FBI og NSA ákváðu að birta þennan þunna þréttánda,“ segir hann og vísar þar til þess að skýrslurnar voru einmitt birtar í gær á þrettándanum.