Ekki verður öðru trúað en að Bjarni Benediktsson missi stjórnarmyndunarumboðið í dag. Bjarni er búinn að bera víurnar í Vinstri græn, að einhverju leyti Framsókn líka og hann hefur átt í viðræðum við Bjarta Framtíð og Viðreisn sem sigldu í strand í dag. Ekki verður séð að aðrar leiðir séu honum færar – að minnsta kosti ekki að sinni.

Líklega verður umboðið komið í hendur Katrínar Jakobsdóttur í kvöld eða í síðasta lagi á morgun. Katrín og aðrir forystumenn VG hljóta að hafa teiknað upp möguleikana sem eru á stjórnarmyndun, en allt veltur það í raun á Viðreisn – hvort hún sé tilbúin að fara í samstarf við vinstri flokkana og Pírata. Framsókn er tæplega inni í myndinni, þannig að eina stjórnarmynstrið sem Katrín getur boðið upp á er VG, Píratar, Björt framtíð, Viðreisn og Samfylking – fimm flokka ríkisstjórn.

Nema þá að menn fari að íhuga boð Pírata um að veita minnihlutastjórn hlutleysi.

Þetta er frekar þröng staða, og satt að segja ekkert sérstaklega miklar líkur á að Katrínu takist þetta. En hún hlýtur að fá nokkurn tíma til að spreyta sig – því það verður að segjast eins og er að Bjarni hefur fengið ágætt svigrúm.