David Cameron, forsætisráðherra Bretlands, er kominn í mikil vandræði vegna aflandsmála.

Faðir hans var yfir sjóði sem geymdi peninga á aflandseyjum. Það er komið í ljós að Cameron sjálfur hagnaðist á þessum bisness. Hann hefur orðið margsaga í málinu.

Nú hækka raddirnar sem krefjast afsagnar Camerons og þeim fjölgar stöðugt.

Cameron hefur þótt vera teflon-maður í pólítík, en kannski er það tímabil á enda.

Fari hann frá er líklegt að George Osborne fjármálaráðherra taki við, en Boris Johnson, borgarstjóri í London, bíður átekta. Hann girnist völdin og er ósárt um að Cameron falli.

Þetta kemur á tíma þegar aðeins tveir mánuðir eru í þjóðaratkvæðagreiðslu um áframhaldandi veru Breta í Evrópusambandinu.

Og svo má spyrja – myndi afsögn Camerons ekki hafa áhrif á Sjálfstæðisflokkinn á Íslandi? Hann hefur alltaf litið mjög til Íhaldsflokksins breska. Stundum er hann nánast eins og móðurskipið.

Staða Bjarna Benediktssonar hefur ekkert verið að styrkjast. Hann virkaði áberandi óhamingjusamur þegar hann var að tilkynna um hina nýju ríkisstjórn. Hann getur ekki verið forsætisráðherra með góðu móti.

Og nú segir einn öflugasti þingmaður Sjálfstæðisflokksins, Unnur Brá Konráðsdóttir, að fleiri hefðu mátt „stíga til hliðar“.