Margoft hefur verið fjallað um hér á þessari síðu þær hugmyndir Pírata að hafa næsta kjörtímabil stutt, kjósa um stjórnarskrá og ESB. Þetta er djarft, en spurning hvernig það fellur í kramið hjá kjósendum þegar nær dregur kosningum. Verða þeir kannski að hugsa um önnur mál? Þannig var sagt frá samþykkt þessarar tillögu á aðalfundi Pírata í ágúst á síðasta ári á Rúv:

Að næsta kjörtímabil verði stutt og þar á þinginu verði eingöngu til umfjöllunar tvö mál; stjórnarskrármálið og aðildarumsóknin að Evrópusambandinu. Og þingið gangi út á það að samþykkja að færa þjóðinni þetta hvort tveggja; annars vegar í þjóðaratkvæðagreiðslu hvað varðar Evrópusambandsmálið og hins vegar að samþykkja nýja stjórnarskrá, sem sagt ný stjórnskipunarlög byggð á tillögum stjórnlagaráðs. Við höldum að þetta sé aðalmálið hjá þjóðinni.

Birgitta Jónsdóttir ítrekaði þetta svo í viðtali í sjónvarpsþættinum Eyjunni snemma í þessum mánuði. Þá sagði hún að enginn afsláttur yrði gefinn varðandi stutt tímabil og stjórnarskrá.

Deilur innan Pírata eru kannski farnar að rista mun dýpra en menn átta sig á.  Sagan segir að lítið talsamband sé milli þingmanna. Kjarninn hefur eftirfarandi eftir Helga Hrafni Gunnarssyni í dag, hann vill ekkert kannast við stutt þing:

Þá sé sá misskilningur í gangi að Píratar vilji styttra þing á næsta kjörtímabili. Það er hins vegar Birgitta Jónsdóttir sem er á þeirri skoðun, en Helgi Hrafn undirstrikar að tillagan hafi verið felld á aðalfundi og að hann sé ekki sammála Birgittu í þessu máli.

Birgitta Jónsdóttir svarar um hæl á Facebook:

Helgi Hrafn virðist algerlega gleyma því að þetta er bara ekki tillagan mín heldur tillaga sem hlaut langmestan stuðning frá félögum okkar í kosningakerfinu: Betri aðafundur um þau málefni sem Píratar vildu leggja áherslu á á aðalfundinum.

Síðan er það stórkostlega mikil rangfærsla að segja að tillagan hafi verið felld, henni var breytt smávægilega þar sem ákveðið var að hafa það opnara en ella að hafa þetta lengur en 9 mánuði, þetta er þó samkvæmt tillögunni ekki ályktun um lengra tímabil en eitt þing. Eitt þing er eitt ár og eitt kjörtímabil eru fjögur ár.